កម្ពុជានិងកាណាដាមានគម្រោងពង្រឹង និងពង្រីកសហប្រតិបត្តិការផ្នែកថាមពល ប្រេង និង រ៉ែជាមួយគ្នា។ ជំនួបការងាររវាងលោក កែវ រតនៈ និងលោក Paul J. Thoppil កាលពីថ្ងៃទី១៤ ខែកញ្ញា ឆ្នាំ២០២៤ លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានជួបពិភាក្សាការងារជាមួយលោក Paul J. Thoppil តំណាងពាណិជ្ជកម្មតំបន់ឥណ្ឌូប៉ាស៊ីហ្វិករបស់កាណាដា ភាគីទាំងពីរបានពិភាក្សាលើការសហការផ្នែកថាមពល ប្រេង និង រ៉ែ ដោយបង្ហាញពីឆន្ទៈក្នុងការពង្រឹងនិងពង្រីកកិច្ចសហប្រតិបត្តិការលើវិស័យនេះបន្ថែមទៀត ដូចជាការងារបណ្តុះបណ្តាលនិងវិនិយោគរវាងរដ្ឋនិងរដ្ឋ ហើយត្រៀមបន្តពិភាក្សាបង្កើតក្របខណ្ឌការងារជាយុទ្ធសាស្ត្រមួយចំនួន។ ភាគីកាណាដាវាយតម្លៃខ្ពស់ចំពោះភាគរយថាមពលបៃតងខ្ពស់របស់កម្ពុជានាពេលបច្ចុប្បន្ន ជាពិសេសការដាក់ពង្រាយថាមពលពន្លឺព្រះអាទិត្យប្រកបដោយចីរភាពនិងសមធម៌។ ភាគីកាណាដា ទទួលស្គាល់អំពីសក្ដានុពលរបស់កម្ពុជា ដូចជាកត្តាសុខសន្តិភាព ស្ថិរភាពនយោបាយនិងសេដ្ឋកិច្ច ការបើកចំហរនៃរបបលើកទឹកចិត្តវិនិយោគ និង កម្លាំងពលកម្មវ័យក្មេង។ យោងតាមអគ្គនាយកដ្ឋានគយ និងរដ្ឋាករកម្ពុជា (GDCE) នៅក្នុងរយៈពេល ៨ ខែ ឆ្នាំ២០២៤នេះ ពាណិជ្ជកម្មទ្វេភាគីកម្ពុជា-កាណាដាសម្រេចបានទឹកប្រាក់ជាង ៧៨២ លានដុល្លារអាម៉េរិក កើនឡើង២៧,៧% បើធៀបនឹងរយៈពេលដូចគ្នានៅឆ្នាំ២០២៣។ ក្នុងនោះកម្ពុជានាំទំនិញទៅកាណាដា មានជាង ៧៣៦ លានដុល្លារអាម៉េរិក ហើយទំនិញកាណាដានាំចូលមកកម្ពុជាមានតម្លៃជាង ៤៦ លានដុល្លារអាម៉េរិក៕ |